စစ်ပွဲကို ကြောက်ရွံ့သူများမဟုတ်ကြောင်း ထိုင်ဝမ်သမ္မတ မာယင်ကျိုးပြောကြား

ထိုင်ဝမ်သည် တရုတ်ပြည်မကြီးနှင့် စစ်ပွဲဖြစ်ပွားရန် ကြိုးပမ်းမည် မဟုတ်သလို စစ်ပွဲကို ကြောက်ရွံ့သူများလည်းမဟုတ်ကြောင်း ထိုင်ဝမ်သမ္မတ မာယင်ကျိုးက ဇွန်လ ၇ ရက်နေ့တွင် ပြောကြားခဲ့သည်။
ပြိုင်ဘက်တရုတ်နှင့် ပတ်သက်ပြီး သဘောထားပျော့ပျောင်းမှုအတွက် ဝေဖန်ခံခဲ့ရသည့် သမ္မတမာက ကျွန်းတောင်ပိုင်းတွင် ပြုလုပ်သည့် လေယာဉ်၊ တင့်ကား၊ စစ်သင်္ဘောများနှင့် စစ်သား ၁၀၀၀ ကျော်ပါဝင်သော သရုပ်ပြ စစ်ရေးလေ့ကျင့်မှုတစ်ခု၌ ပြောကြားခဲ့ခြင်း ဖြစ်သည်။

''စစ်ပွဲဖြစ်ဖို့ ကျွန်တော်တို့ မကြိုးစားပါဘူး။ ဒါပေမဲ့ ကျွန်တော်တို့ စစ်ကို မကြောက်ပါဘူး''ဟု ထိုင်ဝမ်၏ အကြီးဆုံး စစ်ရေးလေ့ကျင့်မှု နေရာတစ်ခုဖြစ်သော Mount Paoli တွင် ကျင်းပခဲ့သည့် စစ်ရေးလေ့ကျင့်မှုကို ကြည့်ရှုရန် ဖိတ်ကြားထားသူများနှင့် သတင်းထောက်များကို မာက ပြောကြားခဲ့သည်။

Lien Yung (သို့မဟုတ်)Joint Endeavour ဟု အမည်ပေးထားသည့် စစ်ရေးလေ့ကျင့်မှုသည် ထိုင်ဝမ်၏ အနောက်ဘက်ကမ်းခြေကို တရုတ်တပ်များ တိုက်ခိုက်သိမ်းယူသည့်သဏ္ဌာန် ဖန်တီးထားသည့် လေ့ကျင့်မှုဖြစ်သည်။ F 16 တိုက်လေယာဉ်များ၊ AH-1W Super Cobra တိုက်ခိုက်ရေး ရဟတ်ယာဉ်များနှင့် Javlin ဒုံးကျည်ဖျက် တင့်ကားများ အကူအညီဖြင့် ထိုင်ဝမ်ခြေလျင်တပ်ဖွဲ့များ နေရာယူထားသည့်အသွင်ဖြင့် လေ့ကျင့်ခဲ့ခြင်းဖြစ်သည်။

မာသည် တရုတ်နှင့် အထူးသဖြင့် စီးပွားရေး၊ ခရီးသွားကဏ္ဍ တိုးမြှင့်ရေး၊ ကုန်သွယ်ရေးနှင့် ရင်းနှီးမြှုပ်နှံမှုများနှင့် ပတ်သက်ပြီး ရင်းနှီးသည့် ဆက်ဆံမှုများရှိသူအဖြစ် ထင်မြင်ခံခဲ့ရသည်။
Ref:AFP